Desde sempre as festas márcanse nos calendarios dos pobos como tempos extraordinarios de celebración que reúnen xente para conmemorar datas relevantes, render cultos, rememorar simbólicos ritos e tradicións ou, simplemente, para rachar coa monotonía arredor da exaltación das ledicias gastronómicas dos lugares, dos compases musicais ou das danzas que merecen pública concorrencia. A identidade cultural e a cohesión social constitúen as motivacións esenciais de calquera conmemoración, tanto no pasado como no presente, segundo destacan os investigadores desta obra. Un equipo de prestixiosos etnólogos galegos realizou unha selección de antigos festexos do ciclo agrario e tradicionais romaxes, xunto a representativas neofestas. Os diferentes estudos están alicerzados no traballo de campo e a súa posterior análise teórica.
Encadernación en tapa dura, 494 páxinas, ilustracións, fotografías en cor e bitón, mapas, gráficos, 32 x 26 cm